‣ Меню 🔍 Разделы
Вход для подписчиков на электронную версию
Введите пароль:

Продолжается Интернет-подписка
на наши издания.

Подпишитесь на Благовест и Лампаду не выходя из дома.

Православный
интернет-магазин





Подписка на рассылку:

Наша библиотека

«Блаженная схимонахиня Мария», Антон Жоголев

«Новые мученики и исповедники Самарского края», Антон Жоголев

«Дымка» (сказочная повесть), Ольга Ларькина

«Всенощная», Наталия Самуилова

Исповедник Православия. Жизнь и труды иеромонаха Никиты (Сапожникова)

Акафист святому праведному Артемию Веркольскому

Написан святым праведным Иоанном Кронштадтским.

Написан святым праведным Иоанном Кронштадтским.

Протоиерей Геннадий Беловолов, директор музея-квартиры святого Иоанна Кронштадтского в Кронштадте: «Известно, что отец Иоанн Кронштадтский сложил акафист праведному отроку Артемию Веркольскому. И когда знаешь об этом, совершенно с другим чувством — словно бы вместе с самим отцом Иоанном — читаешь этот образный и такой яркий акафист Артемию Веркольскому: «Радуйся, прекрасная лилие, верных сердца услаждающая!… »

Кондак 1

Избранному праведнику, дивному предстателю пред Богом, пресветлому светильнику северныя страны нашея, боголюбивому и боголюбезному отроку Артемию, благодетельными чудотворении утешающему и наставляющему покланяющихся с верою святей раце твоей, благодарственная восписующе, радостно и торжественно взываем: Радуйся, предстателю наш, Артемие праведный.

Икос 1

Ангельский нрав и душу непорочную имея от святыя купели крещения, избегл еси обычных света сего суетств и соблазнов, чужд был еси претыканий и падений, втайне чистым сердцем моляся к Единому Всеблагому Богу, милостиво взирающему на кротких и смиренных. Сего ради единогласно вопием ти:

Радуйся, между человеки дивное явление святыни.

Радуйся, Отцу Небесному возлюбленный.

Радуйся, Сыну Божию вожделенный.

Радуйся, Святому Духу сосуде драгий и чистый.

Радуйся, Царицы Небесныя пламенный почитателю.

Радуйся, святым ангелом истинный друже и единонравниче.

Радуйся, праведником святым всем сликовниче.

Радуйся, Церкве Христовой украшение.

Радуйся, делателю благий, в мале верный, над многим поставленный.

Радуйся, вшедый в радость Господа твоего.

Радуйся, носяй венец нетления.

Радуйся, прославленный от Господа Бога дарованием исцелений.

Радуйся, предстателю наш, Артемие праведный.

Кондак 2

Видя чистоту сердца твоего, Благопромыслитель Бог, призирающий всевидящим оком Своим на всю тварь, исполни душу твою благодати Своея от чрева матере. Прославляя убо Его дивное и благое о тебе промышление, поем о тебе хвалебно: Аллилуиа.

Икос 2

Вкусив во младости блаженнаго жития твоего сладость Божественныя благодати, чуждый мирския утехи отроков, ты был еси потаенный сердца человек в нетленном украшении кроткаго и молчаливаго духа, еже есть, по Апостолу, пред Богом многоценно. Приими убо от певцев твоих хвалу сию:

Радуйся, смиреннаго и благодатнаго отрочества Христова подражателю.

Радуйся, благодати Божией хранителю.

Радуйся, родителей твоих почитателю.

Радуйся, в дому отчем образ кротости и послушания.

Радуйся, сверстникам твоим пример благонравия.

Радуйся, хранителю чистоты сердца.

Радуйся, сокрушения сердечнаго таинниче.

Радуйся, приятное благоухание духовнаго умиления.

Радуйся, не приимший искуса мирских сластей.

Радуйся, от греховных страстей свободу улучивый.

Радуйся, благоговейное отроча, стяжавшее духа страха Божия.

Радуйся, боголюбезное чадо, паче жизни твоея возлюбившее Христа Бога.

Радуйся, предстателю наш, Артемие праведный.

Кондак 3

Силою Всесвятаго Духа укрепленный, блаженне Артемие, прияв несокрушимый щит веры и непобедимое оружие Животворящий Крест Христов, знамение страшное для злых духов, сохранил еси себе цела и невредима от злокозненных сих врагов, поя Богу: Аллилуиа.

Икос 3

Имея всегда и во всем упование на Бога Промыслителя, и в убогом отчем дому пребывая, в поте лица твоего приобретал еси пропитание; но лишенный земных благ по воле Божией явился еси причастником вечных небесных благ, праведне Артемие. Похваляя убо твою нищету, лишения и нужды, приветственно вопием ти:

Радуйся, образ кротости и трудолюбия явивый.

Радуйся, нищету нас ради обнищавшаго Христа Бога возлюбивый.

Радуйся, житейских зол непричастный.

Радуйся, грехолюбных корыстей чуждый.

Радуйся, за лишение земное утешенный райскими наслаждениями.

Радуйся, за кротость и смирение наследниче Царствия Небеснаго.

Радуйся, за нужды временныя сподобивыйся изобилия благ вечной нескончаемой радости.

Радуйся, за чистоту сердца удостоивыйся лицезреть Бога вкупе со святыми ангелы.

Радуйся, не прилагавый сердца к благам мира сего непостоянным.

Радуйся, искавый небесных нетленных благ в молитве домашней и церковной и в общении Таин Христовых.

Радуйся, исполненный Божественныя любве.

Радуйся, причастниче безсмертныя трапезы.

Радуйся, стяжавый смирением высокая и нищетою богатая, по подражанию Святителю Николаю.

Радуйся, храма его в жизни твоей молитвенник бывый.

Радуйся, яко мзду многу приемый от Господа Бога на Небесех.

Радуйся, предстателю наш, Артемие праведный.

Кондак 4

Буря страстей и треволнений житейских не постиже тя, имеющаго в сердце твоем мир Божий, вселивыйся богатно в тя, блаженне Артемие; ветры непостоянных учений не волновали мирныя души твоея. Сего ради являя яко Иосиф мир братии твоей, провел еси дни живота твоего в мире, тишине и безмолвии, и мир Божий, обитающий в глубине духа твоего, возбуждаше пети тя непрестанно Богу: Аллилуиа.

Икос 4

Слушая от закона Божия словеса жизни вечныя и имея помазание от Святаго Духа, ведал еси благим чувством вся, не требуя, да кто учит тя, но яко то само помазание учаше тя о всем, по слову возлюбленнаго ученика Христова; воскрилився же Божественным дарованием, отроча младо вознеслся еси на высоту христианскаго благочестия и кротости, Богу возлюбленне Артемие. Сего ради дивное о тебе смотрение Божие славяще, со дерзновением вопием ти:

Радуйся, спасительнаго внимания себе дивный нам пример.

Радуйся, молчания образ.

Радуйся, мудрости духовныя светлое зерцало.

Радуйся, источниче исцелений.

Радуйся, чудотворче предивный.

Радуйся, сокровище целомудрия.

Радуйся, цвете чистоты и незлобия.

Радуйся, невинности сосуде.

Радуйся, цвете ангельския праведности.

Радуйся, многоценный каменю райския жизни.

Радуйся, сияние небесных светлостей.

Радуйся, предстателю наш, Артемие праведный.

Кондак 5

Живоносный ток благодати Христовой восприяв благим и добрым сердцем, праведне Артемие, устремился еси совершенно в след Христа Спасителя нашего, и восхищаясь богатством благости, премудрости и человеколюбия Божия, явленнаго в искуплении грешнаго человечества, пламенел еси любовию к Спасителю нашему и во умилении сердца воспевал еси Ему: Аллилуиа.

Икос 5

Видевше купножители твои преспевающа тя благочестием и разумом, праведне Артемие, прославляху благоволение Божие, утаевающее от премудрых и разумных богатство благодати и ведения ея, по слову Спасителя, и открывающее та младенцем. Темже и мы, радующеся написанию имене твоего на Небесех, с утешением возносим тебе хвалебныя песни:

Радуйся, избранный сосуде Божия благодати.

Радуйся, приятелище даров Духа Святаго.

Радуйся, исполненный дарования чудес исцелений.

Радуйся, вышния премудрости Божией приемниче.

Радуйся, разума духовнаго сокровище.

Радуйся, благий для нас советниче.

Радуйся, исполненный спасительнаго ведения.

Радуйся, пламень неугасающий любве.

Радуйся, всесветлая звездо, блистающая на тверди церковней.

Радуйся, отрада печальным.

Радуйся, немоществующих врачу.

Радуйся, обуреваемых помощниче.

Радуйся, предстателю наш, Артемие праведный.

Кондак 6

Проповедник первый прославленнаго тела твоего, клирик церкви Святителя Николая, ища в лесной чаще плодов земных, обрете сокровище неоцененное, нетленныя мощи твоя, праведне Артемие, чрез тридесять три лета не поврежденныя пременами стихий, и с благодарным чувством преклонь колена, восклицаше к Богу: Аллилуиа.

Икос 6

Возсиял еси в пустыннем месте дебри лесныя, якоже утренняя звезда после мрака нощнаго, и просветил еси скоро население градов древния Кевроли, Пинеги, Архангельска, Вологды и далеких стран сиянием благодетельных чудес твоих. И ныне никтоже умолчит вопити тебе:

Радуйся, великое светило, тьму неведения просвещающее.

Радуйся, сокровище духовное, верных богатящее.

Радуйся, чистая струя благодати Божией.

Радуйся, стране твоей северней слава и утверждение.

Радуйся, якоже чистый ангел песни богокрасныя воспеваяй и к тому обитель твою руководяй.

Радуйся, чистая птица, в гнезда небесная приятая.

Радуйся, яблоко благовонное, верных души благоухающее.

Радуйся, прекрасная лилие, верных сердца услаждающая.

Радуйся, младая ветвь райскаго древа, израстившая сладкий плод духовный Пресвятей Троице.

Радуйся, немерцающий луч Православнаго учения.

Радуйся, маслино Церкве Христовы, источающая нам дивный елей милости Божией.

Радуйся, виноградная лозо, напаяющая нас отрадным упованием на спасительная обетования.

Радуйся, смоковнице, сладостию своею греховную горечь отражающая.

Радуйся, предстателю наш, Артемие праведный.

Кондак 7

Хотящу Всевышнему Мироправителю призвати Своего праведника в небесныя скинии, манием от престола велелепныя Его славы возшуме над землею буря, страшно возгремеша громы, возблиста и разлияся ужасно, яко пламень, молния, и в прикосновении ужаса ко внутренним чувством юнаго отрока, взята ангелами душа праведника, сретаемая безплотными силами, радующимися о друге своем и в веселии воспевшими Богу: Аллилуиа.

Икос 7

Дивно бысть твое призвание в Небесный Иерусалим; от земнаго бо труда на лоно Авраамово, и от малолюднаго места в премирную славу величественно пренесена бысть блаженная душа твоя, праведне Артемие, воздуху шумящу, громам и молниям свирепеющим, и водам от движения ветра, яко руками, плещущим. Темже и мы ликуя воспоем:

Радуйся, новый о нас к Богу предстателю.

Радуйся, в вечный покров Приснодевствующия Царицы вшедый.

Радуйся, ангелом собеседниче.

Радуйся, рая небеснаго жителю.

Радуйся, безстрастия наследниче праведный.

Радуйся, свидетелю нам жизни безсмертныя.

Радуйся, избежавый воздушных истязателей, пораженных стрелами молнии при твоем отшествии на небо.

Радуйся, не узревший мерзких демонских зраков.

Радуйся, райская ветве, благоуханием веселящая.

Радуйся, благовонная едемская роза, души наша благоухающая.

Радуйся, прекрасный грозде, на трапезе царевой положенный.

Радуйся, теплый наш молитвенниче.

Радуйся, предстателю наш, Артемие праведный.

Кондак 8

Странно и недоуменно твое воспитание, праведниче; разума бо Божия исполнился еси и святыни духа достигл еси, ни от кого же из человек учившися; сокровенно от современников и дивно им бысть твое в юных летех благочестие и преставление твое. Но чудныя твоя исцеления и различныя чудодействия возносят наша гласы к славословию о тебе Божию, еже непрестанно и радостно пети: Аллилуиа.

Икос 8

Весь был еси в Боге богомыслием и, укрепляемый Божией благодатию, неприступен явился коварному змию, наблюдающему пяту шествующих тесным путем. Руководи убо и нас непреткновенно ходити путем заповедей Христовых, да благодарно вопием ти:

Радуйся, путеводителю наш дивный.

Радуйся, кроткий наставниче всех спасаемых.

Радуйся, персте Божий, указующий нам горняя.

Радуйся, гласе небесный, зовущий всех на подвиги спасения.

Радуйся, чистая голубице, имущая ветвь райскую.

Радуйся, духовная ластовице, показующая в нетлении весну грядущаго века.

Радуйся, предстателю наш, Артемие праведный.

Кондак 9

Все естество ангельское, в радостный трепет пришед, воздаде хвалу Богу: Свят, Свят, Свят, Господь Саваоф, егда невинная и чистая душа твоя, неврежденная от многих страхований бесовских и перенесенная в премирную жизнь, поклонися Триипостасному Божеству, воспевши Ему со всеми святыми: Аллилуиа.

Икос 9

Витии многословеснии, не могущии усмотрети оком разума, омраченнаго гордостию и страстьми, премудрости творческия в устроении вселенныя, не могут уразумети прославления мощей святаго угодника Божия. Мы же совершенною верою в простоте сердца возглашаем тебе, прославленный молитвенниче наш:

Радуйся, предавший верным в залог любве нетленныя своя мощи.

Радуйся, уверяяй нас в истине Воскресения и жизни вечныя.

Радуйся, исполнивый на себе слово Божие: хранит Господь вся кости праведных.

Радуйся, утвердивый исполнением слово Христа Бога: влас главы вашея не погибнет.

Радуйся, с честию принесенный из дебри в Православный храм для общаго чествования и поклонения.

Радуйся, свидетельствуемый от Господа Бога даром чудотворений.

Радуйся, яко чистая рака святых мощей и ныне привлекает сердца обетных страннолюбцев на поклонение тебе.

Радуйся, явивый истину словес Писания: в память вечную будет праведник, и праведник яко финикс процветет, и яко кедр иже в Ливане умножится.

Радуйся, заграждаяй уста пререкающая.

Радуйся, обуздоваяй язык неверия и хулы.

Радуйся, смиряяй гордыню дерзающим на святыню.

Радуйся, разум кичливый пленяяй в послушание Христовой веры.

Радуйся, в духе блаженныя простоты и незлобия достигнувый Неба.

Радуйся, предстателю наш, Артемие праведный.

Кондак 10

Спасти хотяща всякаго человека, искренно молил еси наставити тя на путь спасения и благодатию Божиею, озарившею тя, пришел еси в Небесный Иерусалим, идеже узрев лицем к лицу Того, Егоже имя, яко миро излиянное, тамо воспеваеши непрестанно славу Богу: Аллилуиа.

Икос 10

Стена тверда и несокрушима ограда обители, святому имени твоему посвященней, суть неусыпныя твоя к Богу молитвы, святый праведный Артемие. Темже живущии в ней благодарно возносят к тебе гласы:

Радуйся, хранителю наш крепкий.

Радуйся, неусыпный защитниче наш.

Радуйся, наставников наших охраняющий от пагубных бедствий.

Радуйся, испущаяй на врагов стрелы страха.

Радуйся, щите твердый паче медяннаго.

Радуйся, броня правды, отражающая каменометания адских муринов.

Радуйся, обители монахов и всей стране нашей похвала и утверждение.

Радуйся, труждающихся помоще.

Радуйся, молчаливых и кротких радосте.

Радуйся, больных исцеление.

Радуйся, немощных укрепление.

Радуйся, унылых бодросте.

Радуйся, скорбящих утешение.

Радуйся, предстателю наш, Артемие праведный.

Кондак 11

Пение наше хвалебное тебе, живущему во славе Отца светов, ныне возсылаемое, недостойно есть, яко от нечистых устен возносимое; но сам прииди посреде нас, неиждиваемый источниче чистоты и целомудрия, очисти наша сердца и души помышления, да тебе ради благоприятно будет совокупное наше восклицание Всещедрому Богу: Аллилуиа.

Икос 11

Светом заповедей Божиих озаренный измлада, скоро возшел еси к Триипостасному Свету, пред Нимже ходатайствуеши и о нашем просвещении, о немже умоляюще, с любовию вопием ти:

Радуйся, звездо невечерняго света.

Радуйся, луче света, согревающая нашу хладность.

Радуйся, свеще, просвещающая нашу темноту.

Радуйся, яко огнь возгреваяй нас к любви возлюбившаго нас Христа Бога.

Радуйся, мысленно прикасаяйся, яко угль, хладным сердцам.

Радуйся, златая лампадо, возжженная для умилостивления Праведнаго Судии.

Радуйся, светильниче духовный, освещающий верным путь спасения.

Радуйся, огненная пещь, пожигающая терние грехов наших.

Радуйся, горнило, курящее молитвенный аромат.

Радуйся, кадило, издающее дивное смирения благоухание.

Радуйся, горящий пламеню, истребляющий нечестие.

Радуйся, предстателю наш, Артемие праведный.

Кондак 12

Благодать Божественную испроси нам, святый угодниче Божий, да присно покрывает нас от врагов видимых и невидимых, да научит ны подражати тебе в чистоте ангельстей и незлобии, да направит сердца наша к смирению, покаянию и неослабному исполнению заповедей Христовых; да дарует нам христианскую кончину и безбедно проведет нас чрез воздушный путь, да сподобимся тамо узрети славу Великаго Бога и вечно пети Ему: Аллилуиа.

Икос 12

Поюще тебе ныне аще и недостойныя, но усердныя хвалы бренными и нечистыми устами, благоговейно молим тя, святый праведный Артемие: призри на многия наша немощи душевныя и телесныя и подаждь нам помощь к совершению добрых дел и ко всегдашнему прославлению святаго твоего имени вопиющим ти:

Радуйся, воине Царя царствующих.

Радуйся, слуго Господа господствующих.

Радуйся, рабе верный Владеющаго всяким созданием.

Радуйся, венчанный венцем нетления от Самаго нетленнаго Бога.

Радуйся, украшенный нетленною диадимою Царствия Христова.

Радуйся, облеченный в блестящую порфиру за чистоту сердца и незлобие.

Радуйся, приемый от руки Божия перстень сыноположения.

Радуйся, наследниче Небеснаго Вечнаго Царствия.

Радуйся, предстателю мощный, споборствуяй Православному правителю нашему на ратующих.

Радуйся, вождю, способствуяй невидимо во бранех нашему воинству.

Радуйся, защищаяй пределы нашего Отечества твердым щитом твоего покрова.

Радуйся, спасения нашего споспешниче и ходатае твоими ко Господу Богу о нас грешных молитвами.

Радуйся, предстателю наш, Артемие праведный.

Кондак 13

О предивный угодниче Божий и прелюбимый чудотворче Артемие! Ради милости Божией и предстательства Владычицы молим твою святыню, милостив буди святей обители твоей и всем призывающим тя с любовию и упованием. По своей чистоте и праведности испроси у Господа Бога прощение наших прегрешений и ревность к добрым делам, да прочее время живота нашего поживем во всяком благочестии и чистоте и сподобимся на Страшнем Суде одесную стати Судии, Христа Бога нашего, и во веки веков с тобою пети Человеколюбцу Богу: Аллилуиа.

Этот кондак читается трижды, затем икос 1-й и кондак 1-й.

Молитва

Святый угодниче Божий, праведный Артемие, присный хранителю святыя веры Православныя и близкий защитниче всего севернаго края Российския страны! Призри милостивно на усердную молитву нас, грешных, и твоим благомощным предстательством испроси нам у Господа прощение согрешений наших, преспеяние в вере и благочестии и ограждение от козней диавольских. Моли Господа, да хранит во здравии и непременяемом благополучии верных людей Своих, да подаст стране нашей мир и тишину, а нам нелицемерное послушание; да сподобит всех нас получити по христианстей кончине Небесное Царствие, идеже вси праведнии вместе с тобою вечно славят Отца и Сына и Святаго Духа. Аминь.

Тропарь праведному отроку Артемию Веркольскому, глас 3-й

Вышняго повелением, тученосным облаком небо помрачившим, и молниям блистающим, грому же возшумевшу с прещением, испустил еси душу твою в руце Господеви, премудре Артемие, и ныне предстоиши Престолу Владыки всех, о иже верою и любовию приходящим к тебе, подаяй исцеление всем неотложно, и моляся Христу Богу спастися душам нашим.

Кондак, глас 6-й

Возсия днесь пресветлая память премудраго Артемия; Богоданная благодать, яко реки, изливает от целебных мощей его дивная исцеления, имиже от многоразличных недуг избавляемся, с верою приемлюще я и взывающе: радуйся, Артемие богомудре.

Величание

Величаем тя, страстотерпче Христов, Артемие, и чтим святую память твою, ты бо молиши за нас Христа Бога нашего.

Память святого отрока Артемия Веркольского 6 июля/23 июня и 2 ноября/20 октября.


См. также

2256
Понравилось? Поделитесь с другими:
См. также:
1
4
Пока ни одного комментария, будьте первым!

Оставьте ваш вопрос или комментарий:

Ваше имя: Ваш e-mail:
Содержание:
Жирный
Цитата
: )
Введите код:

Закрыть






Православный
интернет-магазин



Подписка на рассылку:



Вход для подписчиков на электронную версию

Введите пароль:
Пожертвование на портал Православной газеты "Благовест":

Вы можете пожертвовать:

Другую сумму


Яндекс.Метрика © 1999—2024 Портал Православной газеты «Благовест», Наши авторы

Использование материалов сайта возможно только с письменного разрешения редакции.
По вопросам публикации своих материалов, сотрудничества и рекламы пишите по адресу blago91@mail.ru