​Молитва священномученику Клименту, папе Римскому

О великий чудотворче, священномучениче Клименте! Ты ревностным проповеданием Святыя Троицы и тайны Воскресения Господа Иисуса Христа, яко муж равноапостольный, еще жив сый, сердца неведущих истиннаго Бога чудодейственно просвещал еси, и по блаженнем преставлении твоем благодатию от Бога тебе данною чудеса неоскудно источал еси: приклонися убо и ныне к моим воздыханием сердечным, и твоею милостию и теплым заступлением пред Всемогущим и человеколюбивым Богом нашим просвещение развращеннаго ума и сердца моего испроси, и помози ми во временнем житии сем творити вся в Законе Божии предложенная, всякаго же греха отметатися. Ты, великий подвижниче, от юности твоея клеветы претерпевый, многия же болезни душевныя и труды понесый, помолися ко Господу Богу о мне грешнем и недостойнем, да твоим предстательством и заступлением подаст Всеблагий и мне грешному силу и крепость во благодушии претерпевати клеветы человеческия и яже на земли скорби и сохранити заповеди Его. Ты, о великий чудотворче, на коеждо лето предивное чудо в мори являл еси: и на мне грешнем и недостойнем чудо Божественныя помощи яви, да отступят волны страстей от души моея, да очищуся покаянием, да прииму молитвами твоими здравие души и тела, и прославлю пречестное и великолепое Имя Господа Бога и Его благодать, данную тебе, во веки веков.

Эту молитву читают в Инкерманском Святаго Климента монастыре Симферопольской и Крымской епархии. Память св. Климента празднуется 8 декабря / 25 ноября.

.