Кондак 1
Избранный Богом кроткий воине Христов, благоверный княже Вячеславе, величающе прославльшаго тя Господа, воспеваем ти похвальная. Ты же, издетска Христианскому благочестию наученный и люди твоя в Православной вере утвердивый, от всяких нас бед свободи, да поем ти: Радуйся, страстотерпче Вячеславе, страны Чешския княже предивный.
Икос 1
Ангелов Творец посла тя, святче Божий, Церкви Православной во укрепление, жаждущим же ведения истины во благое вразумление и назидательное окормление. Мы же, дивящеся таковому о тебе Промышлению Вседержителя, со благоговением вопием ти:
Радуйся, веры Христианския насадителю; радуйся, Божиих храмов устроителю.
Радуйся, разума евангельского исполненный; радуйся, Апостолом святым поревновавый.
Радуйся, Духа Святаго в сердце вместивый; радуйся, огнь любве в душе воспламенивый.
Радуйся, явивый стезю духовнаго восхождения; радуйся, земли твоея первейшее украшение.
Радуйся, страстотерпче Вячеславе, страны Чешския княже предивный.
Кондак 2
Видя Господь чистоту сердца твоего, святый отче наш Вячеславе, избра тя во оружие Свое, еже дати земли Чешстей Христианское просвещение, да утверждаеми твоими молитвами и наставленьми, вопиют людие: Аллилуиа.
Икос 2
Разум спасительныя веры открыти ти хотящи, наставляше тя, святый, родительница отца твоего в хранении заповедей Божиих, в познании учения книжнаго, яко да деяние умозрению совокупив, добр христианин явишися. Радующеся убо о тебе, княже, сицевыми хвалим тя пении:
Радуйся, блаженною Людмилою воспитанный; радуйся, праматерию своею наказанный.
Радуйся, премудрость книжную постигнувый; радуйся, языки различныя познавый.
Радуйся, великий в смирении; радуйся, сильный в кротости.
Радуйся, убогих призрение; радуйся, о нищих попечение.
Радуйся, страстотерпче Вячеславе, страны Чешския княже предивный.
Кондак 3
Силою Вышняго укрепляем, возрастал еси во благочестии, страстотерпче, любовь имея к ближним твоим и от тех любовь принимая и вкупе с ними Творцу и Спасу хвалу вознося: Аллилуиа.
Икос 3
Имый родитель твой Вратислав волю благую княжество свое тебе оставити, к алтарю Божию пред лице святительское возведе тя, глаголя тому: "Преподай, Владыко, благословение сыну, наследнику моему". Мы же, видяще Божие благоволение о тебе, сице вопием ти:
Радуйся, якоже праотцы благословение улучивый; радуйся, якоже святый царь Константин венчанный.
Радуйся, постническое житие проходивый; радуйся, во всяцем благочестии пребывый.
Радуйся, язычества дивный просветителю; радуйся, Православия отрадный утвердителю.
Радуйся, о Христовом стаде страны твоея попечение; Радуйся, о словесных овцах земли Чешския помышление.
Радуйся, страстотерпче Вячеславе, страны Чешския княже предивный.
Кондак 4
Буря обстояний и скорбей воздвижеся на страну Чешскую, князю Вратиславу скончавшуся, супруга бо его Драгомира правити начат неправо, христианския обычаи развращающи и злыя человеки к себе приближающе; обаче Промыслитель Бог посла тя, Вячеславе святый, земли твоея тверда хранителя и правителя мудра, да вси людие вопиют Ему: Аллилуиа.
Икос 4
Слышав добрый совет блаженныя Людмилы, приял еси, святе, княжество твое, неправду матере твоея искореняя, и был еси благий отец народу твоему, иже тебе в веселии взываше:
Радуйся, на престоле Боривоя седый; радуйся, во благочестии Людмиле подражаяй.
Радуйся, Вратислава наследниче; радуйся, Болеславу удел даровавый.
Радуйся, верный управителю; радуйся, известный окормителю.
Радуйся, людей твоих защитниче; радуйся, христиан закрыльниче.
Радуйся, страстотерпче Вячеславе, страны Чешския княже предивный.
Кондак 5
Боголюбивыя Людмилы уведев убиение, непщевал еси, отче, яко мати твоя к сему злодейству причастна есть, и абие отослал еси и от двора твоего; последи же, заповедь Господню помянув, раскаялся еси и, возвратив родительницу твою во град на Влтаве реце, Богови воззвал еси: Аллилуиа.
Икос 5
Видим тя внука, почитающа праматерь свою не точию в житии ея, обаче и по смерти: пренесл бо еси мощи ея во град Прагу, преславный твой град, и положил во храме Георгия мученика, отцем твоим основаннем; темже вопием ти тако:
Радуйся, мощи страстотерпицы в столицу преместивый; радуйся, тело мученицы во храме мученика водворивый.
Радуйся, град твой сими обрадовавый; радуйся, верныя люди возвеселивый.
Радуйся, в житии премудрей Людмиле уподобивыйся; радуйся, наставнице и в смерти подражавый.
Радуйся, к ликом мученическим сопричтенный; радуйся, к сонму страдальцев сопричисленный.
Радуйся, страстотерпче Вячеславе, страны Чешския княже предивный.
Кондак 6
Проповедницы благочестия твоего нищии суть и убозии, имже непрестанно благотворил еси, милостиве, призирая на всякаго человека и не отревая никогоже, да вси людие земли Чешския прославят о тебе Бога, вопиюще: Аллилуиа.
Икос 6
Возсия житие твое праведное, благоверне Вячеславе, яко светило светлое и яко звезда незаходимая, во всей стране твоей. Людие же чешстии, лучами твоими просвещающеся, поют тебе и доныне песнь сию:
Радуйся, в преподобии поживый; радуйся, всяку правду соблюдый.
Радуйся, подвижниче богопрославленный; радуйся, угодниче христоименитый.
Радуйся, о прощении грехов наших ходатаю; радуйся, оставления прегрешений наших просителю.
Радуйся, к житию праведному направляяй; радуйся, непорочны ны быти наставляяй.
Радуйся, страстотерпче Вячеславе, страны Чешския княже предивный.
Кондак 7
Хотя Богемию, область, тебе от Бога данную, под руку себе покорити, прииде князь Радислав с вои своими в землю Чешскую. Ты же, блаженне, пролития крове людей твоих не желая, призвал еси на поединок князя, тебе противуставшаго, яко да владеет страною сильнейший. Толикому дерзновению твоему дивящеся, славу Спасителю нашему о тебе возносим, поюще тому: Аллилуиа.
Икос 7
Новаго избранника Божия видяще, безмолвно стояще войско благовернаго князя, суда Господня ожидающе. И се снидошася Вячеслав с Радиславом, и не устоя той и пад, прощения прошаше. И абие восславиша воини и людие князя своего и воспеша тако:
Радуйся, веры Православныя охранителю; радуйся, благочестия христианскаго попечителю.
Радуйся, на Господа печали возлагаяй; радуйся, упованию на Бога научаяй.
Радуйся, доблий и кроткий воителю; радуйся, безкровныя битвы победителю.
Радуйся, градов чешских ограждение; радуйся, весей богемских щите.
Радуйся, страстотерпче Вячеславе, страны Чешския княже предивный.
Кондак 8
Дивное чудо милости Господни видим на тебе, святый мучениче Вячеславе, благочестия бо дела творя, на совет кесаря германского закоснел еси и того ради от собравшихся князей укоряем был еси, обаче с кротостию сие принимал еси и незлобием. Спаситель же Христос умягчи сердце кесарево и срете тя той с любовию, обещав всякое желание твое сотворити, яко исполнитися зависти князем супротивным. О сем убо немолчную хвалу Богу возносим: Аллилуиа.
Икос 8
Весь любве ко святым Божиим исполнен быв, блаженне отче Вячеславе, часть мощей мученика Вита у кесаря испросил еси и во граде Празе церковь в честь угодника сего воздвигл еси. Темже приими от нас похвалы сия:
Радуйся, о славе святым поревновавый; радуйся, в стольном граде храм создавый.
Радуйся, храм сей мученику в дар принесый; радуйся, мощи его тамо положивый.
Радуйся, по кончине и сам в сем храме упокоивыйся; радуйся, со святым Витом на небесех водворивыйся.
Радуйся, от горния славы на чад своих призираяй; радуйся, словеном в напастех помогаяй.
Радуйся, страстотерпче Вячеславе, страны Чешския княже предивный.
Кондак 9
Всякое земное попечение отложити хотя, отче, монашескаго жития взыскал еси, область твою брату оставити желая. Сей же, душевныма очима ослеплен, не позна сокровеннаго стремления твоего, но ков на тя состави. Ведуще обаче, яко любящему Бога вся поспешествуют во благое, зовем Тому: Аллилуиа.
Икос 9
Ветийския словеса не возмогут достойно восхвалити братолюбия твоего, чудне: се бо слугам твоим рекшим, яко брат твой хощет тя убити, не веровал еси сему, помышляя сего друга себе быти. Егда же, идущу ти в храм на молитву, настиже тя Болеслав и мечем удари, сего на землю повергл еси и вопросил еси кротце: «Брате, что убо умыслил еси?» Сего ради глаголем ти похвалы сия:
Радуйся, искренние своя нелестно возлюбивый; радуйся, прияти никоеже зло от них чаявый.
Радуйся, живот свой Богу посвятивый; радуйся, душу свою Господу возложивый.
Радуйся, яко на небесех о брате молился еси; радуйся, яко услышал молитву твою Господь.
Радуйся, яко и нас грешных не оставляеши; радуйся, яко всем спастися желаеши.
Радуйся, страстотерпче Вячеславе, страны Чешския княже предивный.
Кондак 10
Спасти хотя живот свой и душу брата твоего, текл еси ко храму святому, обаче не постыдешася дому Божия клеврети Иуды онаго и настигоша тя на празе церковнем, не ведуще пети: Аллилуиа.
Икос 10 Царю Небесному душу твою вручил еси, страстотерпче, за убивавших тя Господу моляся. Темже воспеваем ти, блаженный княже:
Радуйся, свидетелем Господним подобный; радуйся, страстоносцев древних подражателю.
Радуйся, с первомучеником Стефаном сретивыйся; радуйся, с блаженною Людмилою соединивыйся.
Радуйся, мученическия полки целовавый; радуйся, страстотерпцы вся облобызавый.
Радуйся, видением Лика Божия наслаждаяйся; радуйся, свет нетварный выну приемляй.
Радуйся, страстотерпче Вячеславе, страны Чешския княже предивный.
Кондак 11
Пение Пресвятей Троице от уст твоих, святе, возношашеся непрестанно во вся дни живота твоего; такожде и во смертном часе умныя твоя очи не отвратишася от Творца всяческих, обаче, души твоей от тела разлучающейся, воззвал еси Спасителю Богу: Аллилуиа.
Икос 11
Света невечерняго наслаждашеся уже душа твоя, княже, тело же во храме пребысть три дни, кровь непрестанно источая, аки бы тебе живу сущу; последи же погребоша е верни, вопиюще сице:
Радуйся, отче наш мудре и праведне; радуйся, наставниче наш благий и кроткий.
Радуйся, страданьми Христу уподобивыйся; радуйся, мученьми Спасу последовавый.
Радуйся, пролитием крове Царство стяжавый; радуйся, язв принятием небесе достигнувый.
Радуйся, яко пред Творцем дерзновение имаши; радуйся, яко о народе твоем ходатайствуеши.
Радуйся, страстотерпче Вячеславе, страны Чешския княже предивный.
Кондак 12
Благодать Спаса Христа коснуся сердца дерзкаго убийцы молитвами твоими, и покаяся Болеслав, возопи со слезами: «Аз согреших, и грех мой и беззаконие мое аз знаю!» Желая же покаяние свое не точию словом, обаче и делом явити, пренесе мощи брата своего во град Прагу и положи я во храме мученика Вита, блаженным князем созданном, да вси вернии прославят Бога, дивнаго во святых Своих, и благодарственно вопиют Ему: Аллилуиа.
Икос 12
Поюще честную память твою, Вячеславе мудре, прославляем праведное житие твое, почитаем страдальческую кончину твою и молим тя, святый княже: приклони ухо твое с небесе и услыши присно мольбы чад твоих, вопиющих тебе:
Радуйся, блаженный миротворче; радуйся, дивный чудотворче.
Радуйся, вечнаго Царства достигнувый; радуйся, во обителех горних вселивыйся.
Радуйся, яко престолу Вышняго предстоиши; радуйся, яко Владыце Христу о нас предстательствуеши.
Радуйся, твои бо мольбы приемлет Господь; радуйся, твои бо люди от бед покрывает.
Радуйся, страстотерпче Вячеславе, страны Чешския княже предивный.
Кондак 13
О предивный угодниче Христов, благоверный княже Вячеславе, приими малое сие моление в похвалу тебе возносимое, призри на нас немощных, ко греху преклонных, печальми обремененных и, предстоя в небесней славе Престолу Царя царствующих, молися, да обрящем милосердие Его в день судный, в радости поюще Пресвятей Троице: Аллилуиа.
Сей кондак читается трижды, затем Икос 1 и Кондак 1.
Молитва первая
О святый благоверный княже мучениче Вячеславе, избранный воеводо земли Чешския и всех христиан словенских теплый пред Богом предстателю! Днесь, в память твою единодушно сошедшеся в честнем храме сем и пред иконою твоею умиленно молящеся, сице из глубины сердца нашего к тебе взываем:
Ты в житии твоем ревнитель и защитник Православныя веры был еси — и нас в ней теплыми твоими к Богу молитвами непоколебимы утверди.
Ты великое возложенное на тя служение усердно проходил еси — и нас твоею помощию пребывати коегождо, в немже призван есть, настави.
Ты супостатов полки от отечества твоего силою ратною и мудростию управительною отгнал еси — и на нас ополчающихся всех врагов видимых и невидимых низложи.
Ты в пределах страны своея правду и мир и милосердие насаждати потщался еси — и нам от милостиваго Бога в сих добродетелех преуспеяние испроси.
Ты безвинную кровь твою аки Авель от руки брата своего пред враты церковными пролиял еси — и нас, яко чада единыя Матере Церкве, братолюбию и кротости научи.
О великий и славный княже Вячеславе, ради вящшия славы Небесныя венец земнаго княжения оставивый и венцем мученическим праведно увенчанный! Ныне с мудрою наставницей, праматерию твоею Людмилою, и всеми святыми у Престола Божия предстоя, не забуди нас сирых и убогих, якоже в животе твоем никогоже от таковых оставил еси. И предстательством твоим житие тихое и безгрешное и к вечному царствию шествие устрой нам, да прославим Бога, дивнаго во святых Своих, Отца и Сына и Святаго Духа, ныне и присно и во веки веков. Аминь.
Молитва вторая
О святый княже Вячеславе! Усердно просим тя молитися за ны, да простит Господь Бог наша согрешения вольная и невольная и очистит нас от всякия скверны плоти и духа, да избавит нас от козней диавола и сохранит от клеветы человеческия, да утвердит нас в истинной вере и благочестии, да соблюдет от суемудрых и душетленных учений, да сохранит сердца наша от соблазнов мира сего и да научит огребатися от плотских страстей и похотей, да тако, горняя мудрствующе, а не земная, прославим Единосущную Троицу во век и в век века. Аминь.
Тропарь, глас 4
Днесь Ангели с человеки радуются вкупе общим веселием, небо и земля светло ликуют в память твою, святе. И мы, грешнии, прилежно ти вопием: помолися к Владыце о нас, избавити ны от напасти видимых и невидимых враг, чтущих пресветлую память твою.
Иной тропарь, глас 1
Благочестиваго корене отрасле пречестная, святый благоверный княже Вячеславе, поборник быв Восточныя в Чесех Церкве и прибежище теплое убогим и сирым, яко вторый Авель, незлобиве претерпел еси смерть, во главу усечен рукою брата пред враты церковными. Темже и всели тя Христос яко исповедника правыя веры во обители небесныя, прослави всчесестную память твою в словенских языцех и дарова тя помощника всем почитающим тя. Молися о людех твоих ко Господу, да обратит их в лоно Православныя Церкве и спасет души наша.
Величание
Величаем тя, святый благоверный княже Вячеславе, и чтим святую память твою, ты бо молиши за нас Христа Бога нашего.
На снимках: икона святого мученика князя Вячеслава Чешского; псаломщик Александр Римарчук (г. Прага) держит честную главу святого Вячеслава — Небесного покровителя Чехии.
Использование материалов сайта возможно только с письменного разрешения редакции.
По вопросам публикации своих материалов, сотрудничества и рекламы пишите по адресу blago91@mail.ru