Молитва святому праведному Алексию Московскому

О всечестный и преблаженный отче наш Алексие, дивный старче Московский и всея Церкве Российския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, милующим сердцем болезнуя о всех, просящих твоея помощи. Приими малое сие моление наше, и яко в земном житии твоем отирал еси всяку слезу, облегчал еси всяку скорбь, так и ныне, милосердый молитвенниче и ходатаю наш, возьми тяготы, болезни и скорби наша, исполни страждущая сердца радостию, умоли Человеколюбца Бога о прощении безчисленных прегрешений наших, да очистив душу покаянием, к деланию доброму приступим. Ей, старче благий, буди и нам пастырь добрый, наставляя на стезю спасения, да молитвами твоими безпорочно преидем путь жития нашего и обрящем Отечество Небесное, идеже ты со ангелы и всеми святыми предстоиши Престолу Святыя Троицы, славяще Безначальнаго Отца со Единородным Его Сыном и Пресвятым, и Благим, и Животворящим Его Духом во веки веков. Аминь.

Тропарь, глас 1

Помози в бедах и утеши в скорбех, пастырю добрый, отче Алексие, подвигом бо старчества миру просиял еси, веру и любовь Христову во мраце беззаконий исповедал еси, болезнуя сердцем о всех притекающих к тебе. И ныне моли Бога за ны, любовию чтущия тя.

Кондак

Велии труды любве и милосердия подъял еси, праведный старче Алексие, от святаго пастыря Кронштадтскаго благословение на помощь страждущим прияв, беды и скорби людския яко вериги на рамо свое возложи. Мы же ведуще тя молитвенника дерзновенна ко Господу, со умилением зовем ти: моли Христа Бога спастися душам нашим.

Память святого праведного Алексия Московского празднуется 22/9 июня и 29/16 сентября.