Молитва о даровании молитвы Иисусовой

Господи Иисусе Христе, Сыне Божий, Имени Твоему покланяются Ангели и человеки. Твоего Имени трепещут адские силы. Твое Имя — верных оружие на прогнание супостата. Твое Имя попаляет грехи и страсти. Твое Имя подает силу в подвигах, собирает воедино рассеянный ум и во исполнение заповедей Твоих обогащает добродетелями. Твое Имя творит чудеса и соединяет нас с Тобою, дарует нам мир и радость о Дусе Святе, в жизни же будущей — Царствие Небесное.

Сего ради аз, недостойный раб Твой, молюся Тебе: отжени от нас неведение духовное, просвети познанием Божественной истины и научи нас незаблудно, во смирении и внимательно, с чувством сокрушения, устами, умом и сердцем, по обету монашества, творити непрестанно молитву сию: «Господи Иисусе Христе, Сыне Божий, помилуй мя, грешнаго».

Ты бо рекл еси, Господи, пречистыми устами Своими: «Аще чесо просите во имя Мое, Аз сотворю». Се молитвами Пречистыя Матере Твоея и преподобных отец наших, о Имени Твоем прошу молитвы Пресвятаго Всемогущего Имени Твоего. Услыши мя, обещавший услышати всех призывающих Тя во истине. Твое бо есть еже миловати, и спасати, и даровати молитву молящемуся во славу Твою со Отцем и Святым Духом. Аминь.