О Премилосерднейший Иисусе! О паче меда и сота Сладчайший Христе! О Сладосте наша! О Желание наше! О Радование наше! О Милостивый Боже наш, не до конца на нас, грешных, гневающийся! Молим Тя, в вертограде, даже до поту крове каплющия, молящагося к Богу Отцу Своему. Молим Тя, от Иуды за тридесять сребренников проданного и от иудей оплеванного, посмеянного и к столпу привязанного, люте по ланите ударенного, неповинне на смерть осужденного и тернием венчанного, в багряницу одеянного и Крест на Голгофу Гору понесшего, на нем распятого, в руце и нозе железным гвоздием пробитого, а в ребро копием прободенного и с разбойником повешенного, оцтом и желчию напоенного. Молим Тя, на смутную, болезненно страждущую и утробою растерзающуюся Матерь Твою, под Крестом стоящую, зрящего. Молим Тя, в руце Своему Отцу Дух предавшего, егда рекл еси: Отче Мой, в руце Твои предаю Дух Мой. Молим Тя, от Иосифа и Никодима в гробе каменном положенного. Помилуй нас, Боже, по велицей милости Твоей. Помилуй нас, не хотящих лености ради нимало спострадати Великому Страданию Твоему. Помилуй нас чрез Кровь Твою, от ребр истекшую. Помилуй нас чрез Страсти Твоя, чрез горькое вкушение оцта и желчи, чрез смерть Твою крестную. Молим Тя, даждь нам память смертную, а от смерти наглой сохрани нас, и в час исхода души нашея приими в руце Твои Пресвятые, сквозе гвоздием пробитыя, и помяни нас, Господи, егда приидеши во Царствие Свое, идеже царствуеши со Отцем и Святым Духом, ныне, и присно, и во веки веков. Аминь.
Господи! Аще и всегда распинаем Тя грехами нашими, Ты же, умирая, не отвращаешися от нас, но преклонь Главу прощаеши нас, к Себе призывая.
Покланяемся Страстем Твоим, Христе!
Покланяемся Страстем Твоим, Христе!
Покланяемся Страстем Твоим, Христе! И Святому Воскресению Твоему!
Что день молитву сию чти, да в наглой смерти не даст Христос никогда умрети.
30 марта 1956 г.
Использование материалов сайта возможно только с письменного разрешения редакции.
По вопросам публикации своих материалов, сотрудничества и рекламы пишите по адресу blago91@mail.ru