​Молитвы ко Господу Иисусу Христу схиархимандрита Софрония (Сахарова)

Господи Иисусе Христе, Единородный Сыне Безначального Твоего Отца, отверзи очи омраченныя души моея, яко да и аз разумно узрю Тя, Творца и Бога моего. Молю Тя, не отвержи мене от Лица Твоего, но презрев все мое окаянство, всю мою низость, яви мне свет Твой, о Свете мира, и даждь мне познати любовь Твою к человеку.

О Сладчайший Христе, от Отца ниспославый на святыя Твоя ученики и апостолы Духа Святаго, Сего, Благий, ниспосли и на ны, недостойныя, и тем научи ны познанию Твоему, и открый нам пути спасения Твоего.

Возсияй ми, Боже, Боже мой, свет Твой истинный, яко да во свете Твоем узрю и аз славу Твою, яко единородного от Отца, и да вообразится внутрь мене образ Твой непостижимый, по нему же создал еси человека.

О Боже, Спасителю мой, Свете ума моего и Крепосте души моея, да вселится в мя доброта Твоя, да пребуду и аз непрестанно в Тебе, присно нося в себе Духа Твоего Святаго, иже да даст ми уподобитися Тебе, единому Господу моему, якоже быша подобни Тебе вси от века святыя Твоя.

Ей, Господи Иисусе Христе, по неложному Твоему обетованию, прииди со Отцем и Духом Святым и обитель Твою сотвори внутрь мене. Аминь.

Господи Вседержителю, Отца безначальнаго Сыне и Слове, Иисусе Христе, молим Тя, неизреченнаго ради Твоего милосердия, никакоже отлучайся рабов Твоих, но всегда в нас почивай, и даждь нам никем неотъемлемую радость спасения Твоего; ум наш нетленным светом познания Твоего просвети; души любовию Твоего креста обыми; тела же благоуханием безстрастия Твоего исполни; всех нас до конца очисти и украси; и аще зриши в нас путь неправды, отврати от него и на путь истины Твоея настави.

Ты бо един еси Путь, Истина и Живот, и Тебе славу возсылаем, со Отцем и Святым Духом, ныне и присно и во веки веков. Аминь.

Молитвы схиархимандрита Софрония (Сахарова, †1993), автора книги «Старец Силуан» о преподобном Силуане Афонском.