Молитва детей за усопших родителей

Господи Иисусе Христе, Боже наш! Ты сирых хранитель, скорбящих прибежище и плачущих утешителю. Прибегаю к Тебе сирый, стеня и плача, молюся Тебе: услыши моление мое и не отврати лица Твоего от воздыханий сердца моего и от слез очей моих. Молюся Тебе, Милосердый Господи, утоли скорбь мою о разлучении с родившими и воспитавшими мя родителями моими (имена их), души же их, яко отшедшия к Тебе с истинною верою в Тя и твердою надеждою на Твое Человеколюбие и Милость, приими в Царствие Твое Небесное.

Преклоняюсь пред Твоею святою волею, еюже отъяты бысть от мене, не отыми от них милости и благосердия Твоего. Вем, Господи, яко Ты Судия мира сего, грехи и нечестия отцов наказуеши о детях, внуках и правнуках, даже до третьего и четвертого рода, но и милуеши отцов за молитвы и добродетели чад, их внуков и правнуков.

С сокрушением и умилением сердца молю, Милостивый Судие, не наказуй вечным наказанием усопших незабвенных для меня рабов Твоих, родителей моих (имена их), но отпусти им вся согрешения их, вольная и невольная, словом и делом, ведением или неведением, сотворенныя ими в житии их зде на земле и по Милосердию и Человеколюбию Твоему молитв ради Пречистыя Богородицы и всех святых, помилуй их и вечныя муки избави. Ты, Милосердый Отче отцев и чад! Даруй мне во вся дни жизни моея до последняго издыхания моего не преставати молитися о усопших родителях моих и умоляти Праведного Судию, да учиниши их в месте светле, прохладне и покойне, отонюдуже отбеже всякая болезнь, печаль и воздыхание. Милостивый Господи! Приими днесь о рабех Твоих (имена их) теплую молитву мою и воздай им воздаянием Твоим за труды и попечение воспитания моего в вере и христианском благочестии, яко научивших мя первее всего ведети Тя, своего Господа, в благоговении молитися Тебе, на Тебя Единаго уповати в бедах, скорбях и болезнях, хранити заповеди Твоя, за благопопечение их о моем духовном преуспеянии, за тепло приносимые ими о мне моления пред Тобою и за все дары, ими испрошенные от Тебе, воздай им Своею милостию, Своими небесными благами и радостями в вечном Царствии Твоем. Ты бо еси Бог милостей, щедрот и человеколюбия. Ты покой и радость верных рабов Твоих, и Тебе славу возсылаем со Отцем и Святым Духом ныне, и присно, и во веки веков. Аминь.